1703: Morre Charles Perrault.

O 16 de maio de 1703 morría en París o famoso escritor de contos para nenos Charles Perrault. Chegou a ser secretario persoal dun ministro da súa época, Monsieur Colbert. Foi membro da Real Academia Francesa, de feito, o seu discurso de entrada na mesma ( 1687) provocara no seu momento unha aceda disputa con Boileau por mor dos méritos dos escritores antigos e modernos. Máis tarde reincidiría nesta polémica coa obra titulada Comparación entre antigos e modernos, ou con títulos como Apoloxía das mulleres ou Os homes ilustres que xurdiron en Francia durante o século XVII. Entre a súa produción tamén se atopan algúns poemas, unha comedia e unhas Memorias. Pero o que realmente lle otorgou a fama foron os seus contos, unha serie de narracións tradicionais que el recolleu baixo o título de Contos da nai Gansa, entre os títulos máis soados están: Barba azul, Carapuchiña vermella ou A Cincenta.